Frjálsíþróttadeild Ármanns hefur samið við Björn Margeirsson, Íslandsmethafa í 800 m hlaupi innanhúss og margreyndan landsliðsmann, um að sjá um hlaupaþjálfun hjá Ármanni. Íslandsmet Björns, 1:51,07 mín, hefur staðið óhaggað síðan 2006 og hefur hann ýmsa fjöruna sopið á íþróttaferli sínum. Hann hljóp sitt fyrsta keppnishlaup á braut 8 ára og var að mestu leyti sjálf-þjálfaður allt þar til hann hætti keppni í hlaupum 36 ára að aldri (2015). Bestu tímar hans utanhúss eru m.a. 1:49,35 mín í 800 m, 2:33:57 klst. í maraþoni og 4:19:55 klst. í Laugavegshlaupinu. Hann hefur einnig býsna nothæfa reynslu af styrktarþjálfun og hefur keppt í kraftlyftingum síðan 2016, þyngstu keppnislyftur eru t.d. 242,5 kg í hnébeygju og 163 kg í bekkpressu.

Sjá nánar hér: https://sif.fri.is/keppandi/2984

https://results.kraft.is/lifter/bjorn-margeirsson

Bjössi kemur til með að halda utan um æfingar 3x í viku (þri-fim-laug) í Laugardalnum fyrir hlaupara, sem stefna á keppni í vegalengdum frá 800 m og upp í 10 km. Áhersla verður á fjölbreyttar sprett-, interval- og tempóæfingar, bæði utanhúss og á innanhúss-hlaupabrautinni í Laugardal. Fyrsta æfing er á þriðjudaginn 2. sept. kl. 18 í frjálsíþróttahöllinni í Laugardal.

Nánari upplýsingar má fá með tölvupósti til bjornmargeirsson@gmail.com.